Í oktober 2024 varð ein nýggjur tvørfakligur granskingardepil stovnaður í samstarvi millum Fróðskaparsetur Føroya og Barnaverkætlanina. Depilin, staðsettur á Námsvísindadeildini á Fróðskaparsetrinum, hevur til endamáls at savna, menna og miðla vísindaliga vitan um viðurskifti, ið ávirka børn og ung í Føroyum. Hetta skal tryggja, at avgerðir og tilboð til hendan málbólkin verður grundað á dygdargóða gransking.

Depilin virkar eisini sum eitt netverk fyri granskarar á barna- og ungdómsøkinum, har bæði føroyskir og altjóða granskarar verða knýttir at. Við hesum verður lagt upp til eitt breitt samstarv, sum skal lýsa og menna umstøðurnar hjá børnum og ungum í Føroyum. Ingi H. Højsted, lektari á Námsvísindadeildini, er tilnevndur leiðari fyri depilin, og fer saman við stýrisbólkinum at skipa virksemið.

Eitt av fyrstu átøkunum hjá deplinum er at fremja eina grundkanning, ið skal lýsa umstøðurnar hjá børnum og ungum í føroyska samfelagnum. Henda kanning skal endurtakast við jøvnum millumbilum fyri at fylgja menningini á økinum og tryggja, at tiltøk verða tillagað veruligu tørvirnar hjá børnum og ungum.

Við hesum nýggja granskingardeplinum verður eitt týðandi stig tikið fyri at styrkja vitanargrundarlagið á barna- og ungdómsøkinum í Føroyum, soleiðis at trivnaður og menning hjá komandi ættarliðum verður tryggjað á besta hátt.